މިޒަމާނުގައި އަހުލުއްސުންނަތުގެބައެއް މީހުންގެ ކިބައިން ޢިލްމުވެރިންނަށް ޢައިބުކިޔުމާއި ގުޅުން ކެޑުމުގެ ފިތުނަޔައާއި އެފިތުނައިން ސަލާމަތްވާނެ މަގު
މިފިތުނައިން ސަލާމަތްވާނެމަގު:
ފުރަތަމައީ: ޢައިބުކިޔުމާއި އިންޛާރުކުރުމުގައި އަންނަނިވިކަންކަމަށް ސަމާލުވުން:
1- ޢިލްމުވެރިންނާއި ކިޔަވާކުދިންނަށް ޖަރަޙަ ކުރުމުގައި (ޢައިބުކިޔުމުގައި) މަޝްޣޫލުވެފައިވާ މީހުން މާތް ﷲ އަށް ބިރުވެތިވެ އެކަންކަމުން ރައްކާތެރިވެ، އަނެކުންގެ ޢައިބުކިޔުމުގެ ބަދަލުގައި ތިމާގެ ޢައިބުތަކުން ސަލާމަތްވުމަށްޓަކައި ތިމާގެ ޢައިބުތައް ހޯދުމުގައި މަޝްޣޫލުވުމެވެ. މިގޮތުން އޭނާކޮށްފައިވާ ހެޔޮޢަމަލުތައް އޭނާގެފަރާތުން ޢައިބުބަސްތައް ރައްދުވާ މީހުންނަށް (ޤިޔާމަތް ދުވަހުން) ބަހަންޖެހި އެޢަމަލުތައް ގެއްލިދިޔަނުދީ އެޢަމަލުތަކަށް ރައްކާތެރިވުމެވެ. އެހެނީ މުދަލަކުން ދަރިއަކުން ފައިދާއެއްނުކުރާނެ ދުވަހު، ސަލާމަތް ހިތަކައިގެން އައިމީހަކަށް މެނުވީ ސަލާމަތެއްނެތްދުވަހު އެ ހެޔޮ ޢަމަލުތަކަށް އަނެކުންނަށްވުރެ ބޮޑަށް ޙާޖަތްތެރިވާނެ މީހަކީ އޭނާއެވެ.
2- މީހުންނަށް ޢައިބުކިޔުމާއި މީހުންގެކިބައިންމީހުން ދުރުކުރުކުރުމަށް މީހުން ސަމާލުކުރުމުގައި މަޝްޣޫލުވުމުގެ ބަދަލުގައި ފައިދާކުރަނިވި ޢިލްމު ހޯދުމުގައި ގަދައަޅާ މަސައްކަތްކޮށް ޢިލްމުއުނގެނި އެޢިލްމުން ތިމާއާއި އަނެކުންނަށް ފައިދާކުރުމެވެ. ފަހެ ޢިލްމު ހޯދުމުގައި މަޝްޣޫލުވުމާއި ކުޅަދާނަކަންލިބުނު މިންވަރަކުން ފޮތްލިޔުމާއި ދަޢުވަތުގައި މަސައްކަތްކުރުމާއި ކިޔަވައިދިނުމަކީ އިންސާނާއަށް ފައިދާކުރާނެ ކަންކަމެވެ. އެއީ އޭނާއީ މުޖުތަމަޢު ރޫޅުމުގެ ބަދަލުގައި މުޖުތަމަޢު ބިނާކުރާމީހަކަށް ވުމަށްޓަކައެވެ. އެއްވެސްހާލެއްގައި އަހުލުއްސުންނަތުގެ ޢިލްމުވެރިންނާއި ޢިލްމު އުނގެނޭ ކުދިންގެ ޢައިބުކިޔުމާއި އެބެފުޅުންގެ ފަރާތުން މީސްތަކުންނަށް ފައިދާ ލިބެންހުރިމަގު ބަންދުކުރާ މީހަކަށް ތިބާވެގެން ނުވާނެއެވެ. އެއިރުން ތިބާވާނީ މުޖުތަމަޢު ރޫޅާ ހަލާކުކުރާ މީހަކަށެވެ.
މިފަދަކަންކަމުގައި މަޝްޣޫލުވެ އަބަދުވެސް ކޮންމެވެސްމީހެއްގެ ޢައިބު ކިޔުމުގައި ވަގުތުތައް ހޭދަކުރާމީހާއަކީ އޭނާ މަރުވެގެންދާއިރު މީސްތަކުންނަށް ފައިދާކުރަނިވި ޢިލްމެއް ދޫކޮށްފައި ދާނެމީހެއްނޫނެވެ. އަދި މިފަދަ މީހަކު މަރުވިކަމުގައިވިޔަސް މުޖުތަމަޢަށް ފައިދާކުރި ޢިލްމުވެރިޔަކު ގެއްލުމުގެ އިޙްސާސެއް މުޖުތަމަޢުގެ މީހުންނަކަށް ނުކުރެވޭމެއެވެ. އަދި ކިއެއްތަ މީސްތަކުން އޭނާގެނުބައިކަމުން ސަލާމަތްވިކަމަށްޓަކައި މީސްތަކުން ކުރާނީ އުފަލެވެ.
3- ކިޔަވާކުދިން މީސްމީހުންނާއި ގުޅައިގެން މިވެނިމީހަކާއި ދޭތެރޭގައި ބުނަނީ ކީކޭތޯއާއި، އެވެނިމީހަކީ ކޮންކަހަލަ މީހެއްތޯއާއި މިވެނިމީހަކު އެވެނިމިހަކާއިބެހޭގޮތުން ބުނިބަހާއި ބެހޭގޮތުން ބުނަނީ ކީކޭތޯއަހައި ސުވާލުކުރުމުގައި މަޝްޣޫލުވުމުގެ ބަދަލުގައި އަހުލުއްސުންނުގެ ކިޔަވާކުދިން ހުރިހާތަނެއްގައިވެސް ޢިލްމުހޯދުމުގައި ވަގުތުހޭދަކޮށް الشيخ ابن باز އަދި الشيخ ابن عثيمين رحمهما الله ފަދަ އަހުލުއްސުންނަތުގެ ޢިލްމުވެރިން ލިޔުއްވާފައިވާ، ފޮތްތައްކިޔުމާއި ޢިލްމުވެރިންގެދަރުސްތައް އަޑުއެހުމުގައި މަޝްޣޫލުވާންވީއެވެ.
4- ޢިލްމު ހޯދަމުންދާ މީހަކާއިބެހޭގޮތުން، ކިޔަވާކުއްޖަކު އެމީހެއްގެގާތުން ޢިލްމާއި ފަތުވާ ނެގިދާނެތޯ ނުވަތަ ނޫންތޯ ސުވާލުކުރާނަމަ އެމީހަކާއިބެހޭގޮތުން ސުވާލުކުރުމަށްޓަކައި ރުޖޫޢަވާންވީ (ސަޢުދީގެ) ފަތުވާ ކޮމިޓީއަށެވެ. ވަކިމީހަކާއިބެހޭގޮތުން ވަކިޚާއްޞަ ކަންތައްތަކެއް އެނގިފައިވާނަމަ އެކަން ބަޔާންކޮށް (އެބަހީ އަހްލުއްސުންނަތުގެ އުޞޫލާއީ ޚިލާފު ގޮތްތަކެއް) ސަޢުދީގެ ފަތުވާކޮމިޓީއަށް ލިޔެވިދާނެއެވެ. އެއިރުން އެކޮމިޓީއިން ބަލައި އެކަން ތަޙުޤީޤުކޮށް އެމީހަކާއިބެހޭގޮތުން ވަކިގޮތެއް ނިންމުމަށްޓަކައެވެ. މިގޮތުން އެއްވެސް މީހަކާއިމެދު ސަމާލުވެ އިންޛާރެއްނެރޭނަމަ އެފަދަ ނިންމުމެއް ނިންމަންޖެހޭނީ ފަތުވާނެރުމުގައި އިތުބާރުކުރެވޭ ރަސްމީފަރާތަކުންނެވެ. ޝައްކެއް ނެތެވެ. އެހެނީ ޢިލްމު ހޯދާނެ މީހުންނާއި ބެހޭގޮތުން ރުޖޫޢަވާން ޖެހޭނީވެސް ޢިލްމީ މައްސަލަތަކުގައި އެބައެއްގެ ފަތުވާއަށް ރުޖުޢަވާންޖެހޭ އިދާރާއަކަށެވެ. މިކަން މިގޮތަށް ކުރަންޖެހޭސަބަބަކީ އެއްވެސް މީހަކު އަމިއްލައަށް ތިމާއަކީމިފަދަ މުހިންމުކަންކަމުގައި ގޮތްނިންމާ ފަރާތަކަށް ނުހެދުމަށްޓަކައެވެ. އެހެނީ ތިމާއާއިނުބެހޭ ކަންކަން ދޫކޮށްލުމަކީ އެމީހެއްގެ އިސްލާމްކަމުގެ ރިވެތިކަމުގެ ތެރެއިންވާ ކަމެކެވެ.
އަޞްލު ލިޔުއްވީ: އަލް ޢައްލާމާ ޢަބްދުލް މުޙްސިން އަލް ޢައްބާދު حفظه الله
ތަރުޖަމާ : އަޙްމަދު ސަމީރު ބިން އިބްރާހީމް ޙުސައިން
މައުލޫމާތު: ރާއްޖެއިސްލާމް.ކޮމް
މައުލޫމާތު: ރާއްޖެއިސްލާމް.ކޮމް
